नाशिक, दि. 17 एप्रिल, 2026 (जिमाका वृत्तसेवा): महसूल विभागाच्या विविध सेवा नागरिकांना एकाच ठिकाणी सुलभ व पारदर्शक पद्धतीने उपलब्ध करून देण्यासाठी राज्यभरात एकाच वेळी विशेष शिबिरांचे आयोजन करण्यात येत आहे. तंत्रज्ञानाच्या प्रभावी वापरातून नागरिकांच्या दैनंदिन अडचणी दूर करून आवश्यक सेवा उपलब्ध करुन देण्यासाठी शासन कटिबद्ध आहे, असे प्रतिपादन अपर मुख्य सचिव (महसूल) विकास खारगे यांनी केले.
इगतपुरी तालुक्यातील कावनई येथे आयोजित छत्रपती शिवाजी महाराज महाराजस्व समाधान शिबिर कार्यक्रमात अपर मुख्य सचिव श्री खारगे बोलत होते. यावेळी आमदार हिरामण खोसकर, विभागीय आयुक्त डॉ प्रवीण गेडाम, अपर जिल्हाधिकारी देवदत्त केकाण, उपजिल्हाधिकारी रवींद भारदे, सहाय्यक जिल्हाधिकारी तथा उपविभागीय अधिकारी (इगतपुरी- त्र्यंबकेश्वर) डॉ.पवन दत्ता, तहसीलदार अभिजीत बारवकर, भूमी अभिलेख विभागाचे उपसंचालक महेश इंगळे यांच्यासह विविध विभागांचे अधिकारी व कर्मचारी उपस्थित होते.
अपर मुख्य सचिव श्री खारगे म्हणाले की, महसूल विभागाचा सर्वसामान्य नागरिकांच्या दैनंदिन जीवनाशी थेट संबंध आहे. त्यामुळे नागरिकांना आवश्यक असलेल्या सेवा सुलभ, पारदर्शक आणि वेळेवर उपलब्ध होणे अत्यंत आवश्यक आहे. नागरिकांना कार्यालयीन फेऱ्या माराव्या लागू नयेत, यासाठी शासनाने विविध सेवा एकाच ठिकाणी उपलब्ध करून देण्याचा हा अभिनव उपक्रम राबविला आहे. राज्यातील एकूण ३५८ तालुक्यांमध्ये एकाच दिवशी अशा प्रकारची शिबिरे आयोजित करण्यात आली असून प्रत्येक तालुक्यातील नागरिकांना महसूल विषयक सेवा, प्रमाणपत्रे, अर्ज निकाली काढणे, मार्गदर्शन तसेच विविध शासकीय योजनांची माहिती देण्यात येत आहे. या शिबिरांमुळे नागरिकांच्या समस्यांचे तात्काळ निराकरण होण्यास मदत होत आहे.
“विकसित महाराष्ट्र २०४७” या दृष्टीकोनातून राज्य शासन कार्यरत असून, भारताच्या स्वातंत्र्याच्या शताब्दी वर्षाच्या पार्श्वभूमीवर महाराष्ट्राला प्रगत व विकसित राज्य बनवण्याचा संकल्प करण्यात आला आहे. यासाठी ‘Ease of Living’ अर्थात नागरिकांचे जीवनमान अधिक सुलभ करणे, ‘Ease of Doing Business’ अर्थात उद्योग-व्यवसाय सुरू करण्यासाठी सुलभ वातावरण निर्माण करणे आणि शेतकऱ्यांच्या सर्वांगीण विकासासाठी आवश्यक सुविधा उपलब्ध करून देणे, या तीन प्रमुख घटकांवर शासनाचा भर आहे. या उद्दिष्टांच्या पूर्ततेसाठी प्रशासनामध्ये तंत्रज्ञानाचा व्यापक वापर करण्यात येत आहे. आज सातबारा उतारा मोबाईलवर ऑनलाईन उपलब्ध असून विविध दाखले आणि प्रमाणपत्रे देखील डिजिटल पद्धतीने उपलब्ध करून देण्यात आली आहेत. काही सेवा व्हॉट्सअॅपच्या माध्यमातूनही नागरिकांना मिळत आहेत. यामुळे नागरिकांचा वेळ, श्रम आणि खर्च मोठ्या प्रमाणात वाचत आहे.
शेतकऱ्यांच्या सोयीसाठी पाणंद रस्ते सुधारणा, अतिक्रमण नियमीकरणातून “सर्वांसाठी घरे” या योजनांवरही विशेष भर देण्यात येत आहे. आजचे शिबिर दिवसभर सुरू राहणार असून महसूल विभागाचे अधिकारी नागरिकांना मार्गदर्शन करण्यासाठी उपस्थित आहेत. नागरिकांनी या शिबिराचा जास्तीत जास्त लाभ घ्यावा, असे आवाहन श्री. खारगे यांनी केले.
गावस्तरावर शिबिरे घेऊन नागरिकांचे प्रश्न तात्काळ सोडवा – विभागीय आयुक्त डॉ. प्रवीण गेडाम
महसूल विभागाशी संबंधित विविध कामांसाठी नागरिकांना तहसील व प्रांत कार्यालयात वारंवार जावे लागते. यामध्ये वेळ व श्रम खर्च होत असल्याने गावस्तरावर छत्रपती शिवाजी महाराज महाराजस्व समाधान शिबिरे आयोजित करण्याचा निर्णय शासनाने घेतला आहे. त्या अनुषंगाने तालुक्यातील सर्व विभागांनी समन्वयाने गावांमध्ये जाऊन नागरिकांचे प्रश्न तात्काळ सोडवावेत, अशा सूचना विभागीय आयुक्त डॉ. प्रवीण गेडाम यांनी दिले. या शिबिरांमध्ये महसूल विभागासोबत पंचायत समिती, कृषी, आरोग्य व इतर विभागांनी सक्रिय सहभाग घ्यावा, जेणेकरून नागरिकांना एकाच ठिकाणी सर्व सेवा उपलब्ध होतील, असेही आयुक्त डाॅ गेडाम यांनी नमूद केले.
इगतपुरी तालुक्यात ‘छत्रपती शिवाजी महाराज महाराजस्व अभियान’ अंतर्गत आयोजित शिबिरामध्ये नागरिकांच्या विविध समस्यांचे तत्काळ निराकरण करण्यात येत असून या उपक्रमाला मोठा प्रतिसाद मिळत आहे मागील दोन महिन्यांपासून तालुक्यात विविध ठिकाणी शिबिरे आयोजित करण्यात येत आहेत. या शिबिरांमधून शेतकरी, महिला तसेच सर्वसामान्य नागरिकांच्या समस्या एकाच ठिकाणी सोडविण्याचा प्रयत्न केला जात असल्याचे आमदार श्री खोसकर यांनी आपल्या मनोगतात सांगितले.
कार्यक्रमाच्या प्रास्ताविकात तहसीलदार श्री बारवकर यांनी शिबिर आयोजनामागील भूमिका विशद करून या शिबिरातंर्गत तालुक्यात आतापर्यंत देण्यात आलेल्या लाभाची माहिती दिली.
यावेळी मान्यवरांच्या हस्ते शासनाच्या विविध योजनांच्या लाभाचे प्रदान प्रातिनिधिक स्वरूपात लाभार्थ्यांना करण्यात आले. तसेच महसूल व शासकीय सेवांचे लाभ नागरिकांना तत्काळ उपलब्ध करून देण्यासाठी लावण्यात आलेल्या पंधरा स्टॉल्सला अपर मुख्य सचिव श्री खारगे यांनी भेट देऊन माहिती घेतली. यावेळी मोठ्या संख्येने नागरिक उपस्थित होते.
000
